Lakis Lazopulos, nga Al Çadiri, te Fiks Fare!

Nëse ju pëlqen ky artikull ju lutemi shtypni butonin "LIKE" që ndodhet më poshtë

Kush e ndoqi “Al Çadirin” e fundit (dhe besojmë se e ndoqën, si gjithmonë edhe shumë shqiptarë), do të jetë befasuar kur dëgjoi Lakis Lazopulon, diku nga fundi, të thotë se “Këto ditë isha në Tiranë. U habita, më njihnin të gjithë. ‘Lazopulos’ këndej, ‘Lazopulos’ andej… Kam video shumë të bukura, por nuk janë gati, do t’jua tregoj javën e ardhshme”.

Është e kuptueshme kërshëria, sidomos për shqiptarët e Greqisë, të mësojnë se për ç’arsye shkoi në Tiranë, fenomeni i spektaklit grek, që çdo të martë “betonon” para ekranit 67% të shikuesve (kaq është audienca mesatare e Al Çadirit).

Tribuna u interesua dhe mësoi se aktori e regjisori i shquar (ai është padiskutim një nga emrat më të mëdhenj të sotëm të skenës dhe ekranit grek), u ndodh në kryeqytetin shqiptar si i ftuar nderi nga kompania sponsorizuese e Javës së Filmit grek që u zhvillua në Tiranë javën e kaluar. Por një takim i papritur me drejtorin e emisionit Fiks Fare, Filip Çakulin, bëri që programi i zotit Lazopulos të ndryshojë dhe ai të kalojë një pjesë të mirë të kohës së vet në studiot e Top Channel, ku po përgatitej emisioni i radhës i Fiksit.

Aty, në shoqërinë e Filipit, Saimirit e Doktorit, dhe sigurisht edhe të balerinave të Fiksit, Lazopulos është ndjerë në “ujërat e veta” dhe gjatë komunikimit, nuk është dashur fare ndihma e Çakulit si njohës i gjuhës greke.

Përndryshe, edhe Al Çadiri, edhe Fiksi kanë të njëjtin funksion: të fshikullojnë me gjuhën e satirës shëmtimet dhe padrejtësitë që një grusht oligarkësh, të blinduar pas pushtetit të votës apo të parasë, bëjnë ndaj shumicës, njerëzve të thjeshtë e të pambrojtur, përfshi edhe emigrantët, për të cilët Lazopulos ka shprehur në emisioniet e veta një ndjenjë të lartë solidariteti e humanizmi.

Aty Lazopulos iu dha në shenjë nderimi edhe rrota simbol e Fiksit.

Kësaj here po botojmë disa fotografi ekskluzive nga takimi i Mjeshtrit të Al Çadirit me Mjeshtrat e Fiksit.

Në numrin e ardhshëm shpresojmë t’ju sjellim më shumë hollësi për mbresat e Lakis Lazopulos nga vizita e tij në Tiranë, pas premtimit të dhënë që të na rezervojë kohë për një intervistë.

r.g.

GAZETA TRIBUNA

Nëse ju pëlqen ky artikull ju lutemi shtypni butonin "LIKE" që ndodhet më sipër